Hver er Víkarinn?
Hitti Víkara í heita pottinum í dag. Ég þekki hann ekki neitt. En hann hefur svo gríðarlega sterkt ættarmót að það leynir sér ekki hverra mann hann er. Ég heilsaði honum með þeim orðum að ég sæi á honum að hann væri sonur ... (svo nefndi ég nafn föður hans). Svona er maður orðinn útsmoginn til að geta notað sér fólk í þennan leik hérna á síðunni!
Hann er töluvert eldri en ég. Alla vega nógu mikið eldri en ég til þess að við munum ekkert hvor eftir öðrum í Víkinni. Ég hef oft, í þessum leik, spurt um ættingja hans og tveir af virkustu þátttakendunum í leiknum, Elmar Ernir og Erla Kristins, eru náskyld honum þessum. Hann á nokkur systkini sem eru bæði eldri og yngri en hann. Ekkert þeirra býr í Bolungavík. Hann ólst upp á Holtum, ekki langt frá þeim stað þar sem ég er alinn upp sjálfur.
Hver er Víkarinn?