Hver er Víkarinn?
Ég var í tónleika- og skemmtiferð með Kór Akureyrarkirkju á helginni. Að loknum tónleikum í kirkju í kaupstað nokkrum (þar sem fólk segir líka „á helginni") hitti ég bolvískar mæðgur sem komu til að hlusta á kórinn syngja. Það er lýsandi fyrir móðurina að í lokalaginu, sem var flutt utan dyra um leið og tónleikagestir yfirgáfu tónleikastaðinn, ruddi hún sér braut í gegnum mergð alt-söngkvenna til að kyssa mig og þakka mér fyrir skemmtunina. Kórfélagar höfðu af þessu mikla skemmtan. Sérstaklega vegna þess að ég mun hafa haldið áfram að syngja á meðan á þessu stóð. Missti víst ekki tón úr. Þetta er sem sagt afskaplega elskuleg kona.
Sú eldri býr í Bolungavík. Dótturina þekki ég lítið. Hún flutti úr Bolungavík fyrir a.m.k. tuttugu árum síðan. Við erum þó alveg málkunnug og höfum margsinnis kastað kveðju hvort á annað á förnum vegi. Ég er yngri en hún.
Ég man eftir að hafa málað hús móðurinnar tvisvar sinnum. Í síðara skiptið voru það bara gluggar og þak sem þurfti að mála. Því þá hafði húsið verið klætt utan með efni sem ekki þarf að mála strax. Í þessu húsi býr nú önnur fjölskylda. Kannski stendur þetta hús nákvæmlega í miðjum bænum, þ.e.a.s. að frá því er álíka langt til allra jaðra byggðarinnar, hvort sem farið er inn eða út, upp eða niður.
Hverjar eru bolvísku mæðgurnar?