Mynd og nöfn
Þessa mynd var hún mamma að tala um í athugasemd hér að neðan. Þetta eru sem sagt þrír elstu bræðurnir á Bjarnabæ; Björn, Dóri og Bensi. Björn og afi hafi fengið ný föt úr príslista, mamma segir að þau séu frönsk (býst við nánari skýringum í athugasemdadálki).
Um viðurnefni(Mér finnst eins og til sé annað orð en viðurnefni en ég kem því ekki fyrir mig.)
Ég man ekki eftir því að Eiríkur og Björn hafi verið kallaðir annað en Eiríkur og Björn. En afi, Benedikt og Birgir voru oftast kallaðir Dóri, Bensi og Biggi. Hidda segir stundum Benni þegar hún talar um Benedikt. Mig grunar að hann vilji bara vera kallaður Benedikt. Afa líkaði vel við að vera kallaður Dóri, ég held að Bigga sé alveg sama hvort fólk kalli hann Birgi eða Bigga. Þegar ég var yngri kunni ég illa við að vera kallaður mínu rétta nafni. Mér fannst Karl eitthvað svo asnalegt og snubbótt, en Kalli var ferskt og töff. Nú kann ég ágætlega við Karls nafnið en mér þætti skrítið að vera ekki kallaður Kalli. Í útlöndum einfaldar það málið að heita bara Karl.