Lífæðin
Ég er að hlusta á útvarpsstöð sem haldið er út heima í Bolungavík í desember. Rögnvaldur hennar Elínbetar og Magga Hans og Biggi þeirra Olgeirs og Steffýjar eru að stjórna einhverjum þætti.
Þetta er útvarpsstöðin Lífæðin. Tóti Vagns er útvarpsstjórinn. Hann var lika með þessa stöð áður. Fyrir mörgum árum. Þá var hann með þetta í sviðsstofunni í skólanum. Sennilega oftar en einu sinni. Ég var einu sinni með þátt ásamt Hemma. Við vorum með alls kyns fíflaskap og tónlist. Húsmæður hringdu inn og svona. Svo einhverju sinni kom Venni með gítarinn og við spiluðum eitthvað flott og fínt í beinni. Gott ef Haukur Ástráðs lék ekki með okkur. Og kannski Einar Pétur líka. Ég man það ekki. En við tókum alla vega Violent Femmes slagara - það man ég. Hvort sem við lékum þetta bara tveir eða hvort fleiri voru með.
Mér finnst gaman að eiga kost á því að hlusta á þetta útvarp. Það á ég alveg örugglega eftir að gera aftur nú á aðventunni.