Það sem eg vildi sagt hafa
Þá loksins ég er með á plötu sem kemur út hjá stóru útgáfufyrirtæki og fer í einhverja alvöru dreifingu, geri ég ekkert af því sem ég hef verið að fást við í tengslum við músík síðustu tuttugu árin. Ég syng ekki, spila ekki á mandólín og leik ekki á munnhörpu. Ég spila reyndar á kassagítar (hef nú gert nokkuð af því um dagana). Þannig er að í dag kom út hjá Senu platan Pældu í því sem pælandi er í, þar sem hinir ýmsu tónlistarmenn votta Megasi virðingu sína og flytja lög eftir hann. Það geri ég líka. Ég útset eitt laganna, tek það upp og hljóðblanda í félagi við annan mann.
Á þessu tiltekna lagi er mikill heimilisbragur. Við vorum bara tveir að vinna það að mestu, ég og vinur minn, organistinn. Þegar þannig er verður svo skemmtilegt að ganga í þau störf sjálfur sem manni finnst að þurfi að vinna til að koma laginu í viðeigandi búning. Eins og þeir vita sem þekkja mig hef ég mjög gaman af slíku. Ég þurfti reyndar að gefa mér ansi góðan tíma í sumt. En útkomuna er ég ákaflega sáttur við. Já, í þessu lagi spila ég á banjó og á rafmagnsgítar með slide-hólki. Ég leik meira að segja orgellínur. Okkur fannst það hæfa að klaufinn semdi og léki sumar orgellínurnar en fagmaðurinn aðrar.
Þetta er lagið Heilræðavísur af fyrstu Megasarplötunni. Í textanum gefur barn manískri móður sinni heilræði. Í okkar útgáfu er undirleikurinn borinn uppi af rafmagnspíanói sem Hilmar Örn spilar þungt og jafnt og reglulega og léttum og lifandi trommuleik Sigtryggs Baldurssonar. Söngkonan er 15 ára stelpa héðan úr Biskupstungum, María Sól. Hún syngur þetta æðislega vel og tekst að koma innihaldi textans sannfærandi til skila. Svo eru gítar- og banjómotta yfir þessu og söngraddir, orgel og slide-gítar til skrauts.
Mikið rosalega er ég stoltur af því að þetta lag sé með á þessari plötu.