Þorrablótin #3
Þegar ég var strákur fékk ég oft að sjá generalprufuna á skemmtiatriðunum á þorrablótinu. Það var alltaf svona annáll ársins í spéspegli. Já, maður þekkti oftast einhverja konu í nefndinni sem bauð okkur vinunum að koma til að þær fengju einhver viðbrögð á síðustu æfingu. Einhverntíma var það mamma, í hin skiptin hafa það sennilega verið Sirrý, Helga Aspelund, Björg frænka, Magga mamma hans Péturs, Hidda Einars, Stína Gunnars eða Mumma Lóa. Á þessum gneralprufum voru stundum meðal áhorfenda einhverjir úr hópi þeirra makalausu í bænum sem ekki fengu aðgang að skemmtuninni!
Ég man að ég hafði mikið álit á Mæju Ólafs fyrir það hversu vel hún gat látið röddina hljóma í þessum stóra sal Félagsheimilisins. Svo var Hidda mikill leikari, bæði frökk og skemmtileg. Þarna sá maður konur á sviðinu sem manni fannst skrítið að sjá leika, syngja og dansa. Mömmur og ömmur úti í bæ breyttust í fyndna skemmtikrafta á einni kvöldstund.