Þá er það búið í bili
Máleríinu er lokið og við taka flutningar. Ég ákvað með skyndi í dag að líta við í Reykholti til að tékka á stöðunni á þessu húsi sem við eigum að flytja inn í þann 23. júlí. Þar á margt eftir að gera svo ég hljóp inn á skrifstofu hreppsins og náði þar sambandi við afskaplega almennilegt fólk sem sýndi mér staðinn og reyndi að ráða úr þeim vanda sem blasir við þegar við verðum búin að afhenda íbúðina okkar á Akranesi og höfum ekki í nein hús að venda. Það virðist vera komin lausn á þessu sem hægt er að sætta sig við með þeim hætti að líta á ákveðið millibilsástand sem nokkurskonar útilegu.
ég var ekki kominn heim fyrr en um tíuleytið í kvöld svo ég nenni nú varla úr þessu að aka vestur til Bolungavíkur. En ég fer af stað þangað snemma í fyrramálið.
Góðar stundir,
Kalli