Einn geimur
Ég var að vinna í dag þangað til það gerði myndarlega skúr á Seltjarnarnesinu. Þá skrapp ég austur í Reykholt til að tékka hvernig gengur að reisa húsið sem ég á að flytja inn í eftir þrettán daga. Það er risið, en inni er lítið farið að gera. Á eftir að reisa milliveggi og setja skápa og innréttingar og allan pakkann. Það verður nóg að gera þar í næstu viku.
Ég skellti mér svo í sund þarna í Reykholti. Þar var svo margt fólk í sundi að ég lét nægja að dífa mér rétt aðeins ofan í heitan pott. Svo leit ég aðeins inn hjá tengdapabba og Þóru á Selfossi. Þar fékk ég að borða eins og stundum hefur gerst áður. Nú var ég að koma heim og lífið á götunum á Akranesi er svo fjörugt að mig langar hreinlega að fá mér miðnæturgöngu. Ætli ég skelli mér ekki út á eftir og rölti aðeins niður á bryggju þar sem Skagamenn og gestir þeirra skemmta sér nú við undirleik Papanna og Skítamórals. Ég nenni nú samt ekki á ball en göngutúr gæti verið málið.
Bless,
Kalli