Draumur um koss

Nýjasti textinn er hérna. Þetta hefur verið löng fæðing. Ég er ákaflega sáttur við útkomuna. Kveikjan er ljóð Sigurbjargar Þrastardóttur sem heitir Berdreymi. Þar koma fyrir hendingarnar þrjár sem mynda upphaf versanna hjá mér: „draumur um koss", „andartök heit" og „náttblint og hrjúft hraunið.." Þessi orð Sigurbjargar tengi ég svo við dýrmætar minningar frá því við Gréta vorum ungir og barnslausir námsmenn í Reykjavík. Ég hef fengið grænt ljós hjá skáldinu fyrir þessari notkun minni á orðum þess. Lagið er hægt blúsað kántrí-folk svona eins og sum laganna á plötunni voru. Það er samið með hljómsveit í huga og ákveðna skipan hennar. Því pósta ég síðar. Nú birti ég textann. Draumur um koss eftir Karl Hallgrímsson draumur um koss í dagrenningu víkur fyrir kossi um nótt hvíslandi rödd og ráma ég nem þó að drauminn rjúfi um stund hún hljómaði hvort eð var í huga er festi blund andartök heit hendur kaldar strjúka hörundið hlýtt hratt líður stund hvíslandi rödd verður heit og eldfim glóð hef varðveitt þá minningu og fest í ljóð um að unað veiti brauð úr hveiti dagar dásemda reistar stoðir hvítar voðir blakti án grunsemda um hvað bíði er tíminn líði vökunæturnar með mildu mali leik og hjali við syni og dæturnar náttblint og hrjúft hraunið losar svefninn lífið er ljúft lukka í för sofandi fugl stingur höfði undir væng sæl hvílir perla undir mjúkri sæng