Ferðalag um Austfirði Þá er ég loksins búinn að sjá eitthvað af Austfjörðum. Um síðustu helgi hélt ég tónleika á Egilsstöðum, Breiðdalsvík og Eskifirði. Þá ók ég líka til Norðfjarðar og skoðaði aðeins Fáskrúðsfjörð og Breiðdalinn. Um nýliðna helgi var ég með tónleika á Vopnafirði, Stöðvarfirði og Djúpavogi. Í fyrri túrnum var ég bara einn á ferð og gisti í tjaldi, nú kom fjölskyldan með mér og við gistum heima hjá foreldrum Örvars mágs míns á Vopnafirði og í tjaldi í tvær nætur.

Lítið sáum við af Vopnafirði vegna þoku sem þar var. En við ókum um þorpið og heimsóttum Óla og Hönnu á Strandhöfn. Á Djúpavogi gerðum við töluvert stopp og skoðuðum okkur um. Djúpavogsbúar geta verið stoltir af bæklingi sem hreppurinn hefur látið gera um héraðið. Hann er glæsilegur. Eins höfðaði fjallið Búlandstindur til mín. Glæsilegt fjall. Annars hélt ég að Djúpivogur væri enn fallegri svona miðað við það sem ég hafði heyrt og lesið um staðinn. Ég fann eina frænku mína þar sem var ákaflega áhugasöm um ættfræðina og ég kom henni í samband við mömmu, ættfræðimeistara Ríkisins.

Í gær ókum við suður í Lón, að bænum Hlíð þar sem langafi minn fæddist 1888. Þar rétt hjá er áin Karlsá og sumarsbústir sem hefur verið gefið nöfnin Karlsfell, Karlskot og Karlsberg. Í Berufirði voru líka Karlsstaðir. Mér fannst margt í umhverfinu minna á Ísafjarðardjúp.

Besti maturinn á þessu ferðalagi var maturinn hjá Ásrúnu tengdamóður Halldóru systur. En svo var líka góður matur í N1 sjoppunni á Egilsstöðum. Miklu betri matur en maður gat ímyndað sér að maður fengi í svona SJOPPU. Mæli með henni.  ¶ 4:43 e.h. 1 Ummæli