Héðan í frá - tvö tóndæmi á Netinu Hér eru lögin Svik og Blíðan besta.

Svik samdi ég 1995. Hugmyndin að textanum kviknaði við lestur ljóðabókar með pólskum samtímakveðskap. Geirlaugur Magnússon hafði þýtt þau. Í einu þeirra rakst ég ég á ljóðlínuna „og er sviti minn í holdi þínu svíður" og í kringum hana gerði ég þennan texta. Ég hafði ekkert hugsað um þetta lag í mörg ár þegar ég rakst svo á möppu í kassa heima hjá mér með textum laganna sem ég og Björgvin Ívar vorum að fást við þegar við vorum hvað mest að spila saman. Ég hef kannski munað lagið alveg eins og ég hafði samið það þá, en kannski hefur minnið svikið mig og ég breytt einhverju við lagið frá því ég samdi lagið. Textinn er alveg eins og hann var þá.

Ég var dauðrhræddur um að ég hefði stolið einhverjum hugmyndum úr þessu pólska ljóði og þorði ekki öðru en að fletta því upp og fann, mér til mikils léttis, að það hafði ég ekki gert. Þessi fyrrnefnda ljóðlína kemur fyrir í textanum mínum en að öðru leyti er textinn gjörólíkur þessu ljóði sem var þó kveikjan að textanum mínum.

Ég færði Orra Harðarsyni öll völd þegar kom að útsetningu þessa lags. Ég á nákvæmlega ekkert í henni.

Blíðan besta er lag sem ég gerði 5. júlí 2008. Ég var að svæfa yngri börnin mín tvö þegar lagið kom til mín. Ég tók hugmyndina upp strax - þess vegna man ég dagsetninguna. Fyrst samdi ég laglínu sem heyrist í laginu á plötunni sem einhverskonar millikafli eða sóló, síðar reyndi ég að rifja lagið upp en það tókst ekki betur til en svo að ég mundi það bara alls ekki og til varð önnur laglína við þennan sama hljómagang. Sú laglína er sú lína sem sungin er hér.

Löngu eftir að ég samdi lagið tók ég eftir líkindum í lokahendingu laglínunnar með gömlu þekktu íslensku dægurlagi. Við ákváðum að vera ekkert að eltast við það og breyta bara vegna þess. Þetta er alls ekki eins - nema bara einn taktur.

Takið eftir píanóleik Orra í þessu lagi. Gítarleikarinn Orri spilar þarna á píanó eins og útlærður og þaulvanur jazzpíanisti í blússandi stuði.

Textann við lagið gerði ég seinna, undir pressu því ég var að fara að syngja þetta lag á tónleikum í Bolungavík. Fyrst kallaði ég lagið Augu unnustunnar og Ljóð til Grétu, en svo fékk það þetta nafn, Blíðan besta, en það er engu að síður ljóð til Grétu.


Svik
lag og texti: Karl Hallgrímsson

draumar mínir sofa í arineldi
augu logans svíða hugrekkið
og vonirnar sem virtust taka flugið
vængstýfðar nú kyssa malbikið

blóði drifin blóm
bardagi um þig
og af þeim drýpur morgunsól
og syndirnar sefa
og syndirnar sefa
sýn þína á mig

augnabliki síðar sofnar ljósið
sannleikanum gleymi í brýnni neyð
og er sviti minn í holdi þínu svíður
svík ég þig en blygðast mín um leið

blóði drifin blóm
bardagi um þig
og af þeim drýpur morgunsól
og syndirnar sefa
og syndirnar sefa
sýnina á mig




Blíðan besta
Lag og texti: Karl Hallgrímsson

norðurljósin loga skær
leiftri slá á stjörnur tvær
á björtum himni hanga þær
hátt og lýsa veg
þar sem ég í langri leit
læt mig dreyma um unaðsreit
hvar hann er það enginn veit
- enginn nema ég

á næturhimni dansa dátt
djarft og fjörugt, blítt og kátt
flökta úr einni í aðra átt
ákaft, - stað úr stað
diskóljósin bleik og blá
birtu varpa jörðina á
lítil börn og blómin smá
bera vitni um það

sómi, dyggð og blíðan besta
í bláum augum sjást
verðskuldarðu velsæld mesta,
virðingu og ást

í lífi okkar lýsa tvær
leiðarstjörnur – vel er fær
leið sem gengin var í gær
göngum þú og ég

sómi, dyggð og blíðan besta
í bláum augum sjást
verðskuldarðu vegsemd mesta,
virðingu og ást  ¶ 11:39 f.h. 3 Ummæli

  Héðan í frá - Þessi tilfinning Elsta lagið á plötunni heitir Þessi tilfinning. Það samdi ég þegar ég var 21 árs. Það er nú ekki fyrsta lagið sem ég samdi en það er eitt þeirra fyrstu. Ég samdi það í kompu inn af eldhúsinu í risíbúðinni í húsinu við Skaftahlíð númer 11 í Reykjavík. Hana leigðum við Gréta veturinn 1994-1995 ásamt Bensa mági mínum. Ég hafði þessa kompu fyrir mig til að lesa kennslufræðin á fyrsta árinu í Kennaraháskólanum. Ég man svo vel eftir því þegar lagið kom þarna til mín. Ég sat með gamla Levin gítarinn hennar mömmu og þessi laglína kom bara í litla fingur vinstri handar sem spilaði hana á gítarinn nánast ósjálfrátt.

Fyrst var lagið í D dúr og ákaflega rólegt. Með millistefi sem ég lék á gítarinn og á munnhörpu. Við höfðum þetta á dagskránni okkar við Björgvin Ívar, skólabróðir minn, en við lékum svolítið saman á gítarana þennan vetur. Hann samdi flest lögin, en svo fór ég að semja líka. Annað lag á plötunni minni er einmitt líka frá þessum tíma okkkar Bjögga í dúettnum okkar. Við Bjöggi gerðum einu sinni fjögurra laga kassettu sem þetta lag var á. Þá sungum við þetta saman. Skömmu síðar tók Orri Harðar þetta lag mitt og poppaði það upp með fullt af hljóðfærum og fíneríi, svo hringdi hann bara í mig og lét mig vita að hann hefði gert það og bauð mér að koma upp á Skaga að syngja þetta inn á átta rása segulbandsupptökutæki sem hann hafði þá til umráða. Það gerði ég. Söng lagið inn og lék á munnhörpuna inni á baðherberginu heima hjá foreldrum hans á Vogabrautinni. Þar var fínt sánd til að taka upp söng. Þá var lagið í F dúr og Orri söng á móti mér. Þessi upptaka er til.

Síðan hef ég gert nokkrar upptökur af þessu lagi sjálfur. Þá hef ég bara sungið og leikið á öll hljóðfærin sjálfur og notast við tilbúna trommulúpu úr tölvuforriti. Nema í eitt skipti fékk ég Tungnamanninn Valgeir Þorsteinsson sem var trommari Veðurguðanna til að tromma það fyrir mig.

En núna tókum við lagið upp aftur sl. sumar, við Orri. Við settum mandólínlínur í það í anda REM 1992 og banjó í anda Travis 2000. Hækkuðum lagið enn og höfðum það í G dúr. Svavar Knútur kom svo og söng á móti mér í viðlaginu. Við ætluðum bara að notast við raddir okkar og hafa viðlagið tvíraddað, en svo virkaði það ekki alveg þegar til kastanna kom og við bættum tveimur röddum ofan á þær. Þannig kom þessi fína harmónía þar sem ég syng sjálfur tvær raddir með þeim Orra og Svavari Knúti.

Textinn við lagið varð til um leið og lagið sjálft. En ég var svo lengi að snurfusa hann og laga til. Og þegar ég ætlaði að syngja hann inn í sumar fannst Orra orðin sem ég hafði valið sem rímorð mörg svo erfið í framburði og ekki nægilega góð til söngs. Hann sendi mig heim að breyta textanum og ég endurritaði hann bara rétt áður en ég söng hann endanlega inn. Mér finnst hann hafa batnað mikið. En hann er alls ekki djúpur, þannig. Bara einfaldur popptexti. En þeir geta sannarlega verið erfiðir í smíðum. Ég hef verið einum og fljótur á mér því félagi minn sem las próförk á bókinni sem fylgir disknum benti mér á galla í textanum sem mér finnst alveg ægilega vondur en gat ekki breytt. En ég hef samt lagfært þetta og héðan í frá mun ég sleppa einu sagnorðanna í textanum og nota annað og betra í staðinn.

Ég birti hér textann eins og ég mun syngja hann hér eftir:

Þessi tilfinning
Lag & texti: Karl Hallgrímsson

lifði lengi og dó
í lífsins ólgusjó
var þreytt og þótti nóg
þessi tilfinning
lengi að líða hjá
liggur hjartanu á
haldin þungri þrá
þessi tilfinning

býr í hjörtum ótal elskenda
sem vita að ástin verður ástand
- ekki tilfinning

bíður bæld og köld
bak við gluggatjöld
þykk og þúsundföld
þessi tilfinning
á enda er blús og bið
batnar ástandið
þegar frelsi og frið
færir tilfinning  ¶ 10:55 f.h. 0 Ummæli

  Héðan í frá
Kæru vinir.
Þann 5. apríl kemur út fyrsta hljómplata mín. Hún hefur fengið nafnið Héðan í frá. Titillinn er fenginn úr einum lagatitlanna. Þar er um að ræða eina lagið sem ekki er eftir mig á þessari plötu. Lag Lisu Gutkin sem hún gerði við texta Woody Guthrie, From here on in. Ég tók þetta lag og gerði íslenskan texta sem ég byggi á texta Guthrie. Ég hafði töluvert fyrir því að verða mér úti um leyfi til að gefa þetta út á plötunni minni. Bæði Lisa Gutkin og forsvarsmenn stofnunar þeirrar sem gætir höfundarréttar og útgáfuréttar á verkum Woody Guthrie veitti mér leyfið eftir að hafa heyrt lagið í meðförum okkar Orra Harðarsonar.

Fleiri fréttir af plötunni birtast hér á næstu dögum.

Héðan í frá
lag: Lisa Gutkin, texti: Karl Hallgrímsson (2007)

bara eina leið
héðan í frá
héðan í frá
þennan eina veg
héðan í frá
aðeins eina slóð
bara eina leið
héðan í frá

upp á eina hæð
bara upp eina hlíð
yfir hagana
um engi víð
horfi fram á við
stefni í eina átt
geng um opið hlið
um eina gátt

veð yfir ána
einn lítinn læk, eitt fljót
ég þvera dalinn
hvert gras, hvert grjót

héðan í frá
bara eina leið
þennan eina veg
héðan í frá  ¶ 10:29 e.h. 1 Ummæli